chrüz u quer

Usflug uf Gran Canaria

2011-10-22T10:22:00.000-07:00

Scho am haubi 6i simer z'Bärn ufe Zug für a Flughafe in Züri. Üse Zuestand chame mit aune angere Wörter aus mit "fit & munter" bezeichne. Aber WTFC, mir hei itz Ferie :-)

Mit chline Flügerli, vougstopft mit typische "wir-gehen-immer-in-Strandferien-Touriste" u ungerhautende Ching het üse "auch-wir-gehen-jetzt-einmal-in-Strandferien-Usflug" nach Gran Canaria agfange. D'Sitze im Flüger si äue denn entwicklet worde wos no nidso grossi lüt Lüt het gä... em Dänu sini Schultere si dert gsi wos füre Chopf dänkt wär & dr Chopf het derfür über aus übere gluegt - es het lustig usgseh :-) Mir chei nume no glachet...

Mir hei di Wuche bi agnähm warme Temperature i üsem Bungalow mit Sünnele, Bade, Läse u gaaanz viu Schlafe i voue Züg gnosse.
Natürlech hei mir oscho wider Plän für üses nächste Reisli gschmide ... ;-)

stay tuned...

Juni-Bummel ir Provence

2011-06-17T13:25:00.000-07:00

Über Pfingste si mir z'erste Mau sit das mir zrugg si wider chli ungerwägs gsi ;-) - u zwar ir Provence... Sunne, summerlech warm, wunderschöni Landschafte, feini Crepes mit Nutella, schöni Städtli, X Antiquitätelädeli u zu au däm heimers vier Tag lang lustig gha u glachet bis üs Büch hei weh ta :-) es het eifach nume gfägt!

Amazing 2010

2010-12-24T07:45:00.000-08:00

For the two of us it has been an amazing 2010. It started on the beach in warm and sunny Mui Ne (Vietnam) and will end in cold but beautiful Bern (Switzerland). That's about as good as it gets (at least in our view :-)).During the first eight months of 2010 we had the opportunity to travel around the world and thereby to learn about other cultures, to make new friends, to see spectacular sights and to collect lifetime experiences. After Vietnam we visited Siem Reap (Cambodia), Bangkok and Hong Kong. Towards end of January we arrived in Kiwiland (New Zealand). After more than five great weeks full of hiking, animal watching and sightseeing we headed to Perth to explore the Southwest, West Coast and the northern part of the red continent. In May we then enjoyed the relaxing way of life on the Cook Islands before we arrived in Los Angeles. After touring the (wild) West we drove north and enjoyed beautiful Canada. Finally, in August, we flew back to good old Switzerland.

It took (and still is taking) us quite hard to get readjusted. Priorities shift during times of travelling. However, Regula started to work different smaller jobs while I restarted with UBS in Zurich. In January, Regula will get started as an advisor for mothers and fathers with children below 5 years of age. You see, we are working again but in our minds we are already thinking about future chances for little trips here and there and maybe, maybe a bigger one....at one point in time.....

Enjoy the upcoming holiday season with your families and beloved ones. Have a wonderful X-mas and a happy new year!

Love

Regula & Daniel

Life is like a book, and those who do not travel only read the first page

2010-08-26T12:40:00.001-07:00

I bin es fass ohni bode & ne fernwehfahrer,
gah häb-chläb vo irgendwie bis irgendwo.
Ging müglechscht wyt wäg vo dr
houptschtrass, i reise nid, wüu i a ds ziel wott cho.
D wäut isch es wunger, bi drüber & drunger
sie verschlat eim d schprach.
Ha gluscht & gwunger, ha durscht & hunger
es ligt no so mänge acher brach.
I ha no lang nid aus entdeckt, wo sech vor mir
het verschteckt, wenn I aus, wo me cha gseh, o chönnti gseh, I
gäbt viu derfür.
Glych wie wyt wäg, dass me geit, glych wohi
dr wind eim treit...
(Globetrotter vo Patent Ochsner)

Büecher

2010-08-26T12:22:00.000-07:00

Möget dir öich no erinnere? Im März het dRegula zwöi Büecher gläse gha u ig acht. Scho denn hei sech gwüssi Tendänze la erkenne...itze sit dir sicher gspannt ufz Schlussresultat...

Regula: 5
Daniel: 21

Ps: u nei, kes het nume Biuder gha :-)

Wider Daheim...

2010-08-26T12:05:00.000-07:00

Nach 257 Tag reise mit viu unvergässleche Idrück, Begägnige u Abentür si mir wider zrüg ir Schwiz.

Danke - Merci - Khawp khun kha - Khawp jai - Cam on - Ar kun - Doh je - Cheers / Ka pai - Ta - Meitaki - Thank you

Das isch üses Dankeschön a aui wo üs uf dere Reis hei ungerstützt, üs hei Ungerschlupf bote oder üs eifach e schöni Reisebegägnig hei gschänkt.

Huntington und Newport Beach

2010-08-19T23:25:00.001-07:00

2.Teil Amerika: Washington - Oregon - California

2010-08-11T08:11:00.000-07:00

Nach üsem Rodeoerläbnis in Baker City simer quer dür Oregon a chliine Ortschafte u schöne Landschafte verbi bis ad Westküste gfahre. Ufem bekannte u sehr kurveriiche #1 simer bis L.A.. Uf dene rund 2000 Km heimer widerum viu gseh u erläbt.

Ar Oregonküste sisi Fan dervo mit ATV's (das si so chliini Offroad Fahrzüg) ide Sanddüne umezfrese. Am Wuchenänd chöme si mit ihrne riise Möbu vo Camper inklusive Ahänger u de het jedes Familiemitglied sis passende Fahrzüg - ungloublech! Es isch amüsant gsi däm ganze Spili zuezluege :-)

D'Westküste het ihrem Ruef aui Ehr ata. Es isch bis uf paar Usnahme am Morge geng verhanget u näblig gsi u me het ke Meter wit gseh. Wes de aube gäge Mittag het uftah isch di schöni u ruchi Landschaft ersch richtig zum Vorschiin cho.

O in San Francisco heimer natürlech e Zwüschehaut gmacht. San Francisco isch e super Stadt! Per Zuefau hei mir hie lokali Gastfründschaft chönne gniesse. Nach drü Tag vouer Sunneschiin, viu loufe u Cable Car fahre simer mit viune Tips vo üsere nöie Bekannschaft witer u dür z'Napa Valley (Wygebiet vo Californie).

In Santa Cruz heimer mau öpis ganz angers erläbt. Mir si bim Mystery Spot gsi. Das isch e Ort wo aus angers isch aus me dänkt. So rout e Bau zum Bispiu immer gäge ei Richtig obwou z'Brätt wome se drufleit genau waagrächt isch. Oder me cha 17grad schreg stah u gheit nid um. Wär gross isch erschiint chliin u umgekehrt und und und... (www.mysteryspot.com) üs isches när ganz komisch gsi womer dert si use cho. Bis itz isches no niemerem glunge zerkläre werum das genau a däm Punkt uf dr Wäut aus so verträit louft.
Bis Malibu heimer no diversi Stops igleit (Santa Barbara, Solvang, Camarillo)... itz isch widermau Zyt für "The chocolate side of life"...Ferie ide Ferie am Malibu Beach :-)

"We have no children, but we love ice cream!"

2010-08-09T11:00:00.000-07:00

Im Visitor Center in Fort Bragg:

Dr Dänu isch ga frage wo dases i dere Stadt es Internetcafe git. D'Frou wo het Uskunft gä het gmeint hie heigs kes, aber in Mendocino. Drufabe meint si no: "and if you have children, there is a good ice creamerie"... Dr Dänu het de nume gmeint: "We have no children, but we love ice cream!" :-)

RODEO: Erläbnis pur - Amerika pur!

2010-08-07T12:30:00.000-07:00

Vo Tomate u Eierchoepf

2010-07-28T17:31:00.000-07:00

Bime Früchte-& Gmüesstand im Okanagen Valley churz vor dr Gränze zur USA heimer üs no mit früsche Tomate, Chilis, Ingwer u angerem Gmües ideckt. In Osoyoos simer när über Gränze.

Di ersti Gränzwächterin het üs mitere unfründleche u ecklige Art u Wis dürlöcheret mit hohle Frage. Wosi gseh het dasmer Houzschitter im Outo hei hetsi üs witergschickt zu füf witere Beamte.

Ja ja, ide Houzschitter chönt me drum irgendöpis Ilegaus verstecke u de muess das vo 5 Beamte genauschtens unger d'Lupe gno wärde...
Schlussändlech het eine üses Houz inspiziert, eine het mi mit witere doofe Frage glöcheret (mit mim Schwizerpass ir Hang heter mi gfragt us welem Land dasi chume :-) u aschliessend heter üs z'Outo usenang gno. Di räschtleche 3 Beamte si umegstange u hei däm ganze Tribe zuegluegt.

I gloube dä het jedes einzelne Schäftli dürnuelet. Sogar dr Chüeuschrank heter usgrumt. Tomate u Chilis womer öpe 10 Minute vorhär kouft hei, hei ihm nid passt... das dörf me nid id USA ifüehre....ha gmeint i ghör nid rächt. Churz vor dr Gränze verchoufe si Gmües & Frücht wome nid darf über Gränze näh u kein Schwein seit öpis oder schribt öpis a.
Woni ha gfragt ob mr de di Tomate haut itz hie no dörfi ässe heter gseit nei das sigi nid erloubt. När hets mr andgüutig dr Dechu glüpft. Bevor mr aber de öpis usegrütscht isch woni äue speter beröit hät isch mr de zum Glück no i Sinn cho dasi ja itz uf Amerikanischem Bode stah u gschider schwige.
Dä *#?&! Beamte het drufabe nüt bessers gwüsst zsäge aus dasmer ja wider nöii Sache chöi ga choufe... ha ha ha... dä isch ja superlustig.

Es Seckli Chilis & 6 Tomate ermer simer de haut witers...

Kanada

2010-07-11T13:48:00.001-07:00

Di 5 Wuche Kanada si schlichtwaeg dr Hammer gsi!
Mir hei so viu schoens gseh u auerhand erlaebt. Si viu ga wandere, ga rite, Tier beobachte (Baere, Wale, Adler, wunderschoeni Voegu usw.), hei noeii Bekanntschafte gmacht, si ga bade u hei d'Sunne u di wunderschoeni und zum Teil sehr idrueckelche Landschafte gnosse.Der Daenu isch mit sine Gedanke maengisch ono chli z'Oustralie gsi u het zwoei bis druemau bire Chruezig di fautschi Strassesite gno...nach dr erste Schrecksekunde hani de aube nume no glachet.

Einisch ischer cool bire fautsche Ifahrt ine u naebe de richtig fahrende Outos verbi aus wis znormauschte vor Waeut waer... di hei aui zimlech schreg us dr Woesch gluegt u d'Waeut nuem verstange - das haet me soeue fiume :-)

Itz geits fuer ues wider zrug id USA. O nach ueber 7 Monet reise hei mir no nid gnue - mir froeie ues uf di Moenet wo no vor ues lige...

Highlights Kanada:
Natur: Seeae, Waeuder, Tier; Spout Lake; Moraine Lake; Okanagen Valley; Abetuer im Banff & Jasper Nationalpark; Scotia & Co.; fruesche Lachs aesse...mmh!

Glacerating

2010-07-07T20:15:00.000-07:00

Nach ueber 7 Moenet umereise um muehsame probiere vo unzaehlige Glace hei mir, nach langer Diskussion u no lengerer Bedaenkzyt, beschlosse ueses Glacerating azpasse. Mir vergaebe tatsaechlech a ei Glace zMaximaurating 10. Mir choei ues schlichtwaeg nid vorsteue, dases uf dere Waeut no besseri Glace git aus die in ... Queenstown, Neuseeland (Chocolates Patagonia Gelatteria - hand made in New Zealand).

Kanada faegt!

2010-06-29T11:43:00.000-07:00

Yellowstone Nationalpark

2010-06-11T10:36:00.000-07:00

Zwoei Tag heimer im Yellowstone Nationalpark verbracht. Es isch eine vode schoenste Paerk womer bis itz hei gseh. D'Natur mit dene absolut unbeschriblech schoene Waeuder, See, Steppe, Baerge...di viufaeutigi Tier-& Pflanzewaeut.

Ueberau im Park gits aktivi Geysire wo ab und zue bis zu 100m hoech spoeie. 2mau heimer grad viu miterlaebt wi das isch we sone Wasserfontaene chunt. Mir si aui pflotschnass worde...hi hi

Od "Mud Volcanos" si faszinierend, das si blubberndi Schlammfulkaen.

Es het Elche, Baere, Woeuf, Bisons, Bibbere, Falke, Adler, Gaens u no viu meh...
Mir hei zGlueck gha dasmer e Grizzlybaer us oepe 100m Entfernig hei gseh. Aer het sech hinegreme Boum versteckt u immer wider fueregluegt...es isch super gsi e Baer so ir Natur zgseh. Mir hoffe natuerlech dasmer de in Kanada no viu meh waerde gseh...:-)

1. Teil Amerika: California-Nevada-Arizona-Utha-Idaho-Wyoming-Montana

2010-06-11T10:04:00.000-07:00

In L.A, respektive Santa Monicca, hei mir paar Tag schwiz-amerikanischi Gastfruendschaft gnosse. In Venice Beach simer au di schrege Gstaute wod ert umeloufe ga beoeigere u hei drueber gschmunzlet was dene Amis aus i Sinn chunt. I gloube mir hei no nie so viu schregi Voegu uf eim Huufe gseh :-)

E Tag simer ide Universal Studios gsi u hei di Mischig zwuesche Funpark u Fiumhintergrundinformatione gnosse.

No nid lang mit uesem Outo ungerwaegs hei mr in San Diego scho zerste mau Kontakt gha mit dr Polizei...es het ues e Bsoffne am Morge am 11i mit sim Charre grammt. Aer het ues genau so breicht dases grad dr Hahne vo uesem Wassertank het abgschalage u 90 Liter Wasser si ire Fontaene uf d'Strass usegspruetzt. ...SUPER...!Zum Glueck het ne de Polizei chli speter grad gschnappet. Aer isch naehmlech eifach witergfahre. Am Schluss isch de uscho daser no 6 witer Outo verwuetscht het mit sine paar Promille zviu im Bluet. Dr Schade am Outo isch gluecklecherwis no am gliche Tag behobe worde u ues hets nuet gmacht.

In San Diego simer o zerste Mau ine Outlet Mall. Das isch super gsi. Dert chame shoppe bis eim d'Ohre waggele, es het so viu Laede dases eim vorchunt wine chliini eigeti Stadt.

Via Anzac Boreggo Wuesti, Joshua Tree Nationalpark u Death Valley simer uf Las Vegas gfahre.

Hie hei mr dr Raescht vor Familie nach 6 Monet reise wider troffe. Z'sibet hei mr di Stadt u ihres Nacht-& Spiulaebe erkundet. Es isch super gsi u het mega gfaegt! Sehr idruecklech mit au dene unzaehlige u risige Hotelalage mit de grosse Casinos ungerinne. Weme nid isch dert gsi chame sech gloub gar nid vorsteue wi das isch, obwou me scho viud ervo ghoert u Biuder gseh het.
Vo Las Vegas us simer via Hoover Dam (2.groesst Damm ir USA) i Grand Canyon. Daderfuer gits eigentlech fasch keni Wort: risig u gwautig i sine Dimensione u duer das ischer eifach nuem idrueckelch. Im Monument Valley, Antelope Canyon, Bryce Canyon heimer o aui grad wider gstuunet. Es isch uuu schoen gsi! Je nach daem wi dSunne grad schiint choeme wider angeri Farbe zum Vorschiin - geniau!

Am Lake Powell simer 3 Tag zschoene Waetter u dr See ga gniesse. Ei Tag heimer es Boot gmietet. Mir si zfride ufem See ga umecruise, hei gwakeboardet u gsuennelet - herrlech!

Nach some Tag haet me daheime am liebste o grad sones Boot :-)

Ufem Waeg richtig Kanada simer in Virginia & Nevada City verbi. Dert isches wi fruecher im Wiude Weste. D'Hueser & d'Irichtige si no so erhaute wis sich gsi, ide Laedeli heisi no au di aute Buechsene u Graet vo dere Zyt. Mir si ues grad chli vorcho wi ir Vergangeheit...es isch spannend gsi ir Zyt vode Cowboys u Saloongrils umeztoebere...

Es isch schoen mit dr Familie zreise u mir hei jede tag viu z'lache... :-)

Cook Islands

2010-06-11T09:59:00.000-07:00

Zyt vergeit wi im Flug. Sit uesne Ferie ide Ferie uf de Cook Islands hei mir scho wider viu erlaebt.Cook Islands, speziell Aitutaki (e wunderschoeni Lagune), si troumhaft gsi. Mir hei zwar nidso schoens Waetter gha wi erhofft, aber es isch gsi wi im paradies u mir hei di zwoei Wuche extrem gnosse.

The chocolate side of life

2010-05-02T15:05:00.000-07:00

So, nach fuef erlaebnisriche, geniale u churzwilige Reisemoenet isches zyt fuer chli Ferie...mir goe fuer die naechste zwe Wuche ufd Cook Islands ga Bade, Schnorchle, Lige, Laese, Fulaenze - angers gseit eifach ga d'chocolate side of life ga gniesse!

Sydney

2010-05-02T15:03:00.000-07:00

Sydney - e henne cooli Stadt! Es isch gmüetlech, guet zum Shoppe, zum Glace schläcke, zum i Usgang ga..... hie hets üs eifach gfaue :-)

Üsi Oustralie Highlights:

Perth, troumhafti Straend, Pinnacles, Pferderenne, Schnorchle am Ningaloo Reef, Karaijini National Park, 4-WD Abentür, Tunnel Creek, Emma George, Bungle-Bungles, Tierwäut, Sydney, Famiglia Schruppatelli, BBQ u gmüetlechi Äbe mit aute u nöiie Bekanntschafte

Ningaloo Reef - Karijini Nationalpark - Broome - Gibb River Road - Darwin

2010-04-29T00:23:00.000-07:00

Am Nigalooreef bi Exmouth si mir ga schnorchle. Es isch super gsi! Wunderschoeni Fische u Koralle, riise Roche, Schiudchroet u o Haie hei mir gseh unger ues duere schwuemme.
Troumhafti Straend mit tuerkisblauem Meer - herrlech!

Ir einte Nacht hei mir no Bsuech uebercho. Mir si scho im Bett gsi u uf zmau chraeschlet oepis verusse. Woni hingerem Vorhaengli fuereluege luegt mi es risigs Kaenguru a. Mir si beidi so erchluepft das z'Kaenguru dervo ghuepft isch u i z'Vorhaengli grad wider ha zue ta.

Vo Exmouth us si mir i Karijini Nationalpark. Dert hets viu schoeni, verschideni, grossi u chliini Schluchte zbewandere gae u oepe genau so viu natuerlechi Pools wome drinne het choenne bade.

Dert hei mir o uesi ersti Begaegnig miteme Dingo gha (irgend es Gmisch zwuescheme Wolf ume Hung). Di choei raecht aggressiv si u si gseh o nid grad fruendlech us. Mir si aui froh gsi woner dr Schwanz het izoge usech verdrueckt het.

Dr 80-Mile-Beach isch ueses naechste Highlight gsi. E aendlose Strand mit extremer Ebbe u Fluet. Bi Fluet isch dr Strand nume schmau & bi Ebbe chame zum Teu ueber 100 Meter useloufe. Sehr idruecklech. Am 80-Mile-Beach chame o sehr guet Fische...mir hei z'Glueck gha das ues uese Campingnachbar mau mitgno het u ues het zeigt wime das macht. Es isch auso gar nidso eifach gsi wimer gmeint hei u brucht fei e chli Geduld. :-)
Es het hennae gfaegt u mir hei viu z;lache gha... vorauem we aube d;Fischkoeder scho waehrendem useschiesse vor Ruete i aui Himmusrichtige dervo gfloge si :-)
Leider hei mr nidso Glueck gha bim Fische wimer ues das usgmaut hei. Di zwoei chliine Exemplar wo ar Ruete ghanget si hei mir wider frei gla.

Nach 6286Km u 35 Tag simer in Broome acho. Zum Teu hets interessanti Streckine zrueg zlege gae, aber maengisch simer Stunde gfahre u es het immer glich usgseh u we de i 300Km mau e Kurve isch cho isch das e riise Abwaechslig gsi :-).

Broome het ues gfaue. Es het es chlises Zaentrum miteme uraute Openairchino u e sehr schoene Strand. Miteme angere Schwizerpaerli hei mir dert paar Tag am Strand verbracht u viu glachet zaeme. Es het u gfaegt!
Grad bi Broome isch o z'Cape Leveque. Das isch e Haubinsle wome nume miteme 4WD-Fahrzueg cha befahre. Es isch super gsi ueber di Sandpiste zfrese u mir si grad chli 4WD-Fan worde :-).

Das no zviu graegnet het u d'Fluess no viu Wasser hei gha simer ni ueber d'Gibb River Road gfahre. Mir hei aber vo unger u vo obe e Abstaecher dri gmacht.Windjana George isch e sehr schoeni Schlucht mit unzaehlige Suesswasserkrokodil wo uf de Sandbaenk suennele oder sech im Wasser abchuele. Mir hei se vo ganz nach gseh...grueslig...

Dr Tunnelcreek isch es chlises Abetuer gsi. E Hoehli wo e Fluss duere geit (inklusive Schlange, Krokis u suesch Getier) u am angere Aendi isches wunderschoen. Mitere Taschelampe u chli eme mulmige Gfueu simer duer das truebe, huefthoeche Wasser gwaatet bis mir nach 800 Meter guet am angere Aendi si acho u di schoeni grueni, steinigi Schlucht hei choenne bestuune. Natuerlech hei mir dr glich Waeg wider zrueg muesse...

Vo obe uf dr Gibb River Road simer in EL Questro, Zabadee Springs u Emma George gsi. Aus wunderschoeni Orte wome zu Pools & Wasserfaeu cha wandere u chlaettere. Ueses Highlight isch d'Emma George gsi. Am Aendi vore Schlucht wome ueber Stock u Stei u Fluss erreicht hets e hennae schoene Wasserfau u e riisige Pool mit klarem Wasser zum Bade. D'Feuswaend si mit saftig-gruenem Farn ueberwachse...eifach es Paradies - herrlech!

O Bungles-Bungles oder o Purnululu Nationalpark hei mir nid usgla. Miteme chliine Fluegerli simer di spezielle Feusformatione vo obe ga bestuune. Leider isches chli luftig gsi u das chliine Flugi het uf aui Site gruettlet, was i u mi Mage chli weniger lustig gfunge hei...

Nacheme Abstaecher i Kakadu-& Litchfield Nationalpark si mir am 26.Apriu mit 9781,3 gfahrne & pannefreie Kilometer in Darwin acho.

Hie heimer eifach paar Tag d'Stadt gnosse, si widermau usgibig itz Internet u heis ues bim uswaerts Aesse la guet ga :-)

Itz froeie mir ues risig uf z'Grossstadtlaebe in Sydney...

Fahrzueg u Fahrer

2010-04-27T18:15:00.000-07:00

Isches no wit...

2010-04-26T17:51:00.000-07:00

Sit am 1. April si itz o uesi Fruende Didle & Marc ungerwaegs. Mitem Velo wei si bis nach Istanbul oder no witer. Waers wunger nimmt wo si ueberau duerefahre u was si ungerwaegs aues so erlaebe cha das uf www.ischesnowit.ch verfouge.

Impressione Westoustralie

2010-04-07T18:56:00.000-07:00

Oustralie: Perth - Coral Bay via South-West-Australia

2010-03-26T22:51:00.000-07:00

Perth het ues am 1.Maerz mit 36-38Grad empfange. Sit denn heimer nume wenigi chuelerti Taeg gha. Z'Perth heimer schwitzerischi Gastfruendschaft doerfe gniesse :-). Mir heis gnosse u es het gfaegt Luet ztraeffe womer kenne u chli zlafere. Wo am Morge DRS3 ueber z'Internetradio isch cho isches fasch chli gsi wi Daheime. Mit uesem riise Moebu vo Outo simer e Tour duere Suedweste vo Oustralie ga mache. Wunderschoeni Straend, Kaenguruh, e huufe Voegu u Haie, Surfer, noeii Bekanntschafte, Chlaettere, Glace schlaecke, Bade u d'Sunne gniesse. Es isch super gsi.
Zrugg in Perth hei mir de d'Mino-Family troffe zume BBQ.
Naer simer los richtig Norde. 1.Stop "Pinnacles" (Feusnadle wo us dr Wuesti userage). Bevor mr die si ga aluege bim Sunneungergang hani am Strand no e Surfer "doerfe" verarzte :-) wosech e zimlech wueschti Verletzig ghout het.

In Geraldton simer amne Pferderenne gsi. Das het hennae gfaegt! Es isch ues vorcho wi im Fernseh: Schiggi Froue mit de grosse Huet u d'Manne ide Hemli wo ihri Wette goe ga abgae. Mir hei richtigs Afangerglueck gha... :-)

Via Kalbarri Nationalpark simer uf Monkey Mia und Shark Bay.Derzwuesche heimer ufere Raststaette pfuuser. Es isch aus tip top gsi abgseh bis uf di abartige *#x?!@y Floeige wo eim wuerklech ueberau haere fluege. Das het oepe schoen ganervt. Zum Glueck hets de in Shark Bay nume no einzelni Floeige gha. Diraekt am Meer heimer uese Camper haeregsteut, d'Sunnedach ufgspannt, z'Tischli u d'Stueu fueregno u hei dr Nami u Abe eifach gnosse bis d'Sunne unger isch. Wi im Prospaekt isches gsi... :-) In Monkey Mia heimer diraekt am Strand Delphine gseh vo ganz nach, 11 Stueck in ganze. Zum teu heisi riise Sprueng duer d'Luft gmacht - isch hennae kuhl gsi!
Natuerlech heimer o Coral Bay nid usgla. O da heimer wider e wunderschoene wisse Sandstrand u troumhafts Meer atroffe u si ga Bade u Schnorchle.

Itz heimer immer no viu vor ues hie in Oustralie u si gspannt was ues no aus erwartet u wasmer no aus choei entdecke hie am angere Aendi vor Waeut.

iMeet: Chruez u quer meets Aussi News

2010-03-15T01:14:00.000-07:00

Mir si tip top in Oustralie acho u gniesses i voue Zueg. Drum simer o chli im Hingerlig mit uesem Blog :-)
E chliine Bricht finget dir aber ungerm Aussie-News Blog.

Buecherupdate

2010-03-15T00:14:00.000-07:00

Mir si auso nid nume am ploeischle. Nei, nei mir si zum Bispieu o am laese...

oemu dr Daenu...:-)

Daniel: 8
Regula: 2

Zahle u Fakte vo uesere Neuseelandreis

2010-03-05T00:10:00.000-08:00

Gfahreni Kilometer: 5875.6 km

U zum Schluss no drei erstunlichi Zahl...

Iwhoner Neuseeland: 4.2 Millione

Schaf in Neuseeland: 40 Millione (u das si nume die laebende...)

Raege pro Jahr in Milford Sound: 8 Meter pro Quadratmeter

Neuseeland

2010-02-22T11:35:00.001-08:00

Di 5 Wuche in Neuseeland si eifach super gsi. I uesem chliine, aber praktische Campervan hei mir z'Land erkundet.

Bis uf 4-5 Tag hei mir immer Glueck gha mitem Waetter u heis gnosse i Tag inezlaebe.

Die verschidnige Landschafte, d'Ost- u Westkueste wo totau verschide si, di genial schoene Morge- u Abestimmige, dae ungloublech schnaeue Waetterwaechsu vo extrem schoen zu grusig u chaut, z'Usmass vo dene absolut abartig laestige Sandfloeige, z'entdecke vo diverse Tier wos bi ues nid git (Delphine, Seeloeie, Pinguine, Wale u verschidensti Voegu), di ville Trekkingmueglechkeite u natuerlech d'Gastfruendlchkeit vode Neuseelaender (im Garte vo Maori u angerne Familie schlafts sech guet *smile*) hei ues sehr gfaue u beeidruckt u mache Gluscht uf meh.

Ps: O d'Outopanne isch ues natuerlech nid erspart blibe. Mit dr noeie Batterie isch de uese Charre aber wider gluefe wi gschmiert.

Highlights:

Geniali Trekkings (Tongariro Crossing, Copland Track, etc.); Tierbeobachtige; Morge- u Abestimmige; Burells und Moors (ae super Family u es cools pensionierts Paerli); Nelson/Richmond; The Catlins Coast

Ersti Impressione Neuseeland

2010-02-03T13:35:00.000-08:00

Zahle u Fakte vo uesere Asiereis

2010-02-03T12:40:00.000-08:00

Bruchti Verkehrsmittu:
Velo, Tuk-Tuk, Toeff (saeuber gfahre), Toeff (Bifahrer), Miniboes, Minivan, Local Bus, Bootli, Schiff, Faehre, Zug, Flugzueg, Taxi, Tram

Verbrachti Stung i de obe gnennte Verkehrsmittu: 161

Rekordzau Moskitos i uesem Zimmer: 37 zeuti + ?
Z'Biuigschte Aesse: 75 Rappe pro Person
Die biuigschti Uebernachtig: 3 Franke pro Person

U zum Schluss no drei erstunlichi Zahle...
Iwohner Saigon: 10 Millione
Motorbikes in Saigon: 6 Millione (u die si oepe immer ungerwaegs!!!)

Tuberkuloseverbreitig in Kambotscha: 65% vor Bevoeukerig

Hong Kong

2010-02-03T12:33:00.001-08:00

Dank guete Hong Kong Tipps si mir vo dere Stadt nid grad voellig ueberrout worde. Z'Prisniveau, z'Waetter ud Kultur si in Hong Kong ganz angers aus in Bangkok, Saigon, Hanoi oder Luang Prabang. Nachem erschte Schock hei mir e chlini Stadtrundfahrt gmacht wo aber duerz schlaechte Waetter nid besser isch worde (dr Naebu het d'Sicht zimmlech igschraenkt). Ide raeschtleche zwoeiehaub Tag hei mir aber vieu guets u interessants endtdeckt.
Mir si so fansziniert gsi vor abentleche Lasershow das mir die grad zwoei mau si ga luege, einisch vo Hong Kong Island us u einisch vom Festland us.Kulinarisch hei mir natuerlech einisch muesse richtig Dim Sum ga aesse, schuesch si mir aber immer ir GreatFoodhall aztraeffe gsi. Dert gits aues was me nach langer Zyt in Asie aus Westler vermisst...Salat, Roastbeefsandwichs, Haerdoepfustock u no vieu, vieu meh - eifach super!

Witeri Stichwort vo uesere Hong Kong Zyt si Wan Chai Computer Center, Starferry, Doppustoeckertram, Mangotaefeli u Denner vo Hong Kong (we dir meh zu dene Sache weit wuesse choeit dir ues ja zum braetle ilade wemer zrueg si *smile*).

U zum Schluss no e chline Tipp fuer die vo oeich wo eventuell o mau uf Hong Kong wei: Internetkafis fingt me praktisch keni (ussert mi het WiFi).

Highlights: Skyline, Lasershow, GreatFoodhall

"Red Bull verleiht Fluegel" oder ueses letschte Suedostasieschnaeppli

2010-01-26T01:58:00.000-08:00

Agfange hets harmlos...mir hei ues zwoei Travellers gsuecht wo sech z'Taxi a bangkoker Flughafe mit ues teile. Wueu mir aui gnue Zyt hei gha, hei mir am Taxifahrer verbote uebere Expressway z'fahre (das choschtet Aextragebuehre). Trotz sire Wahrnig vor starchem Verkehr ir Stadt hei mir ues fuer dae Waeg entschlosse. Nach ere Stung Fahrt duere (wuerklech starche) Verkehr het uese Fahrer bire Tanksteu ghaute u isch schnaeu oepis z'trinke ga choufe (das isch in Europa o unvorsteubar *smile*). Nachdaem mir si witergfahre het sech dr Verkehr immer meh ufgloest u mir si schneuer u schneuer u no mau schneuer gfahre. Ueses Taxi het sech bi Tempo ueber 120 km/h duere Verkehr gschlaenglet (maengisch nume cm-wis naeb de angere Outos verbi). Dir ahnets scho - uese Fahrer het es Red Bull trunke u vo denn a si mir am Flughafe richtiggehend entgaegegfloge u nach ca. 75 Minute Fahrt schliesslech mit flauem Gfueu im Mage aber i eim Stueck acho. Zaut hei mir nume grad zwoei Franke pro Person - es Schnaeppli *smile* fuer so e laengi Fahrt.

Kambotscha - Bangkok

2010-01-26T01:39:00.000-08:00

Di churzi Zyt in Kambotscha heimer in Siem Reap verbracht. Siem Reap isch chliin, ruhiger, eher laendlech u het Charme, isch aber sehr ufe Tourismus usgrichtet. Es het mega viu Kaffis & Restaurant, X Staend mit Schmuck, Sideschaeu & Gwuerz u es isch aus i US Dollar agschribe. Bide ATM's chame o nume USD usela u we dr agschribnig Priise e ungrade Betrag isch ueberchunt me Lokauwaehrig (Riel) zrug. Im Verglich zu Thailand, Laos u Vietnam isch z'Laebe hie erstunlecherwis oder wider eher "tuer" gsi.

65% vode KambotschanerInne hei Tuberkulose. Die Zauh isch hennae hoech u drum isch si ues oso guet blibe...in Siem Reap steit eis vo fuef Chinderspitaeler vom Dr. Beat Richner (CH - Arzt, Link uf uesm Blog). Ga aluege het me z'Spitau nid choenne, aber dr BEat Richner het e Vortrag ghaute womer viu beidruckends ghoert, gseh u erlaebt hei.

Natuerlech simer o Angkor Wat ga aluege. Das isch zgroesste religioese Bouwaerk vor Waeut, e mega Taempustadt. Mir si am Morge 4.30 ufgstange, hei es Velo gmietet u si fuere Sunneufgang dert haere gfahre. Es si sehr idruecklechi Boute mit sehr viu Finesse u Details. E riise Buetz bis das aus isch fertig gsi. Es het X verschideni (u glich irgendwie glichlegi) Taemple. Mir si es paar ga aluege, hei paar Foeteli gmacht, ues la vouquasle vo Ching wo oepis hei woeue verchoufe (mir heine de Taefeli gschaenkt) u derzwuesche heimer ues eine abgstramplet mit uesne Chruepuvelo. 1. sisi viu zchliin gsi (haut fuer Asiate gmacht) 2. heisi u hert gha (ke Gangschautig) u 3. sisi fasch usenang gheit. Di ca. 35Km heisech agfueht wi 70Km :-). Es het aber u gfaegt u mir heis lustig gha uf uesne Zwoeiradcabriolet.
Bevors witer isch gange uf Hongkong simer de no fuer zwoei Tag zrug uf Bangkok chli ga koemerle :-) u umeschlaendere.

Highlights: Sunneufgang bim Angkor Wat, Chinderspitau vom Beat Richner, wider thailaendisch aesse

Impressionen Asien II

2010-01-17T23:18:00.002-08:00

Alfred in Angkor

Russian Buddha in Mui Ne

Real Buddha

Currypflanze

Risnudlefabrik; mitere Schaeri waerde si hie idi richtegi Groessi gschnitte

E Frou wo Rispapier macht (z.B. fuer Fruehligsroue)

Dalat - Mui Ne - Ho Chi Minh City - Mekong Delta

2010-01-13T11:07:00.000-08:00

Nach au dene ville Idrueck womer bis itz gsammlet hei, heimer beschlosse mitem Boes a Kueste zfahre uf Mui Ne u eifach mau paar Tag ga a Strand lige u nuet mache ussert d'Sunne gniesse, bade, laese, schlafe u fein aesse. Es isch herrlech gsi u het sooo guet ta.
D'Boese hie in Vietnam si nid viu schneuer aus in Laos u so heimer e laengi Boesfahrt uf ues gno fuer di wenige Kilometer nach Ho Chi Minh City (Saigon) zfahre.
Es isch e risegi Stadt mit no meh Vespas aus Hanoi (was fasch unvorsteubar isch).

D'Stadt isch aber viu fruendlecher u weniger chaotisch, sowie dluet o. Je meh dasme gaege Suede reist in Vietnam desto fruendlecher u hiufsbereiter waere dLuet.
Mir si ime Guest Hous glandet wos im Internet het gheisse das z'Morge u z'Nacht u e Fruechtechorb im Priis inbegriffe isch plus no angeri Sache...nachem zwoeite Abe heimer de gmerkt dases jede Tag zgliche z'Nacht git u das dr "Fruechtechorb" nume us Banane besteit. :-)
Vo Saigon us heimer e 2taegige Usflug itz Mekong-Delta gmacht. Das isch ganz im Suede vo Vietnam. Dr Mekong isch eine vode laengste Fluess vor Waeut wo ungerangerem duer Laos, Vietnam u Kambotscha fliesst.

Es si zwe interessanti u lustegi Taeg gsi. Mir si duer Floating Villages gfahre mitm Bootli u si ufeme Floating-Market gsi, hei gseh wisi Coconut-Candy mache & natuerlech o probiert...mmh...u hei s Churzkonzaert vo "Traditional Music" ghoert (dr Daenu & i si grossi Fans worde vo dere Musig *big smile*).

I daem Hotel womer waehrendem Usflug pfuuset hei ischmer zur Abwaechslig widermau es Missgschick passiert: Woni ha woeue dusche isch nid wuerklech viu Wasser us dr Bruse cho. Wini bi hani a aune Redli u Schruebli afa umetraeie wos het gha u uf z'mau isch e riise Fontaene us dr Wang gschosse. Nachem erste Chlupf hani nume no glachet u bisi das Loch aendlech wider ha choenne zuestopfe isch zganze Bad unger Wasser gstange...me soet haut nid oepis ar Wasserleitig umeschrueble...hi hi

Nachere usgibige Stadterkundig in Saigon, neue Bekanntschafte u Idrueck froeie mir ues itz uf Kambotscha...

Highlight's:
Relaxe bi Sunne, Strand & Meer, noeii Bekanntschafte, villi chliini lustegi u unvergaesslechi Situatione

Vo Hoi An bis Dalat mit em Toeff

2010-01-12T23:11:00.000-08:00

Ihr Autjahreswuche hei mir ues oepis Bsungrigs gleistet. Mir si vo Hoi An i saechs Taeg duerz zentrale Hochland nach Dalat gfahre. U zwar hei mir das nid oepe mit em Boes oder em Zug gmacht sondern ufem Ruecksitz vo zwe Toeffe.

Dr Long u dr Tonh si die zwe Easy Riders (dae Name hei si vom Lonely Planet uebercho) wo ues chauffiert und ganz vieu interessanti Sache zeigt u verzeut hei. Normalerwis steit bi so emne Trip vor auem dr Vietnamchrieg im Vordergrund aber da mir ues no fuer vieu Angers hei interessiert het sech z'Schwaergwicht naer chli meh uf "Land u Luet" verleit.

So hei mir i dene saechs Taeg Iblick i Nudu-, Ris-, Kaffi-, Pilz-, Bachstei- u Zuckerfabrike (oder maengisch o eher Familiebetribe) uebercho, hei Iheimischidoerfer (sogenannti Minority-Doerfer) bsuecht (d'Regula het am Long fasch Loecher i Buch gfragt wueu si natuerlech genau het woeue wuesse was de passiert wes ere Frou oder em Ching nid guet geit ir Schwangerschaft oder bir Geburt, und was de isch wenn, und, und, und.. *smile*) u natuerlech vieu lokaus Aesse usprobiert (vietnamesischi Pancakes - henne guet!).

Natuerlech hei mir o vo au dene vile Schlachte im Vietnamchrieg u vor verherende Wuerkig vo "Agent Orange" (e chemische Kampfstoff wo vo de Amis tonewis isch igsetzt worde) ufd Umwaeut ghoert. Mir hei no vieu meh gseh, zum Bispieu wie das d'Froue ide Minority-Doerfer no mit dr traditionelle Methode tue Waebe oder de het ues dr Dorfeutischt es Privatkonzaert ufem ne aute Musiginstrumaent gae, oder ...

dir merket mir hei so vieu erlaebt i dene Taeg das mir fasch nid wuesse wo afa u wo ufhoere mit Verzeue. Aus i auem isches es einmaligs Itouche i die vietnamesischi Kultur gsi u fuer ues sicher eis vo de ganz grosse Highlights vo dere Reis.

Ps: Zum teu isches sehr abentuerlech zue und haer gange ufem Toeff...aber mir si oemu heil in Dalat acho u hei ungerwaegs ufem Ruecksitz vom Toeff so vieu vor Landschaft choenne gseh wie das aeuae mit kem angere Verkehrsmittu mueglech waer gsi.

Highlights: Die saechs Taeg si eifach eis grosses Highlight gsi

Oeie Saenf...

2010-01-02T04:06:00.000-08:00

Leider isches bis itze nume Gmail-Nuetzer mueglech gsi uf uesem Blog Kommentare zhingerla. Itze wo mir gad chli "Free-Internet" gniesse hei mir ues Zyt gno u Kommentarmueglechkeit fuer aui ufta. Das heisst das ab sofort Jedi u Jede si Saenf cha zue uesne Itraeg gae. Mir si gspannt u froie ues ueber jede Itrag :-)

Ufloesig vor Wiehnachtsumfrag

2010-01-01T01:49:00.000-08:00

Entgaege aune Erwartige hei mir Wiehnachte in Vietnam verbracht. Gneuer in Hoi An, es haerzigs, charmants u malerisches Staedtli in Zentrauvietnam.

Bide Buecherumfrage isch dr Stand nach genau eim Monet reise so:
Daniel: isch grad am zwoeite Buech
Regula: hets fang gschafft dr Buechumschlag vom erste Buech zlaese ;-)

Mir wuensche aune e schoeni Wiehnachte u es guets noeis Jahr

2009-12-24T19:37:00.000-08:00

Impressionen Asien

2009-12-24T19:15:00.000-08:00

Hanoi

2009-12-17T00:01:00.000-08:00

Nachere Wuche in Laos simer de scho witer nach Hanoi (Vietnam). Wo dasmer dert hei pfuset erratet aeua niemer :-)... Mir si zwoei Naecht im Hilton gsi u hei nidemau oepis zaut derfuer...hihi :-)...es isch hammer gsi!

Hanoi isch grouehaft. Es isch chaotisch vo A bis Z, vorauem uf de Strasse (es Wunger si mir nid ueberfahre worde, vorauem nachdaem das Vietnam irgend e wichtige Schuttmatch het gwunne u aui wi di Verruckte duer d'Strasse graset si). Drum froeie mir ues umso meh uf paar Tag ir beruehmte Halong Bay.

Highlights sit Pai: Chiang Mai Sunday - Evening - Market, Fahrt mitem Local Bus in Laos, Schwuemme mit de Elefante, villi noeii Bekanntschafte, Hilton Hanoi

Laos

2009-12-16T23:47:00.000-08:00

Vor Graenze us heimer dr "Local Bus" gno nach Luang Namtha (Nordlaos). Das isch e zimlech abetuerlechi Fahrt gsi. Mir si widermau di einzige Nid-Asiate gsi, dr Boes isch fasch usenang geit u mir si uf dae schiterste Strasse (meistens unteeret u mit riise Loecher) 4 Stung ungerwaegs gsi fuer 195km. Maengisch simer nidso sicher gsi ob mr aech de heil am Zieu achoeme. I dere verschlafene Stadt simer e Tag duere Dschungu ga trekke. Das isch super gsi. Wunderschoeni, unberuehrti Natur u Kontakt mit Moensche us de Baergdoerfli wo no ganz urspruenglech si. Sehr idruecklech wi di Luet dert laebe u was fuerne zfridene Idruck si drbi mache.

Paar Tag speter isches witer gange. Mir hei de beschlosse chli e komfortablere Boes z'naeh fuer Richtig Suede z'fahre. D'Strasseverhaeutnis si uf dere Strecki no vieu leider gsi aus bir erste Fahrt. Quer duere Dschungu (ungloublech schoen u idruecklech) uf schmale Chisstrasse simer 8 Stung (300 Km) ueber Stock u Stei. Totau dueregschuettlet aber tiptop simer im gmuetleche Luang Prabang acho.

Hie simer e Tag ines Elefantecamp. Mir si mit de Elefante im Mekong (Fluss) ga schwuemme u hei druf choenne rite. Isch schono es speziells Gfueu mit so maechtige Tier im Wasser zsi. Me het nie so raecht gwuesst wenn das dr Elefant wome ungerem Fuedli het wider ungertoucht oder sich traeit. Es isch u lustig gsi u es ungloublech tolls u einzigartigs Erlaebnis.

Mit zwoei Israelis, ere Brasilianerin, ere Kanadierin, em ne Duetsche heimer es TukTuk gmietet u si zude Wasserfaeu usserhaub vo Luang Prabang. Da isch ei Wasserfau am angere anne gsi, drumum Natur pur. Vo sehr grosse bis zu ganz chline Wasserfaeu hets aus gha. Aui si duer Fluessli mitenang verbunde, zwueschine hets wider es houzigs Wasserrad oder wunderschoeni Lagune wome dri het choenne ga bade ud Sunne gniesse.

Zum Schluss no es "feins" Biudli vom lokale Maerit in Luang Prabang.......

Nordthailand

2009-12-16T23:32:00.000-08:00

Ufere zimlech kurvige Strass si mir no witer noerdlech greist uf Pai. Zum Glueck hets wo mir si cho nume no naebem Bifahrer Platz gha u zum Glueck gits Medis gaege Reisechrankheit. Parne hinger im Boes hets zimlech dr Mage kehrt - gruusig...
Lut Reisefuehrer haets dert no raecht urspruenglech u untouristisch soeue si. Es isch de aus angere aus das gsi. Mega viu Touris, tuerer aus Chiang Mai u d'Staedtli saeuber nid speziell sehenswaert. Pfuuset heimer ire Lotterhuette, rundum Gueggle u Huehner wo iem am 4i hei zum Bett usgno u z'Abwasser vom WC isch quer duere Garte gflosse...mmh daea Duft... ;-)
MItere gmietete Vespa simer de e Tag d'Umgaebig ga erkunde, was wuerklech u schoen isch gsi. Mir hei schoeni Wasserfaeu gseh, si i diverse abglaegene Doerfli verbi gfahre u hei d'Sunne gnosse.
Via Chiang Mai simer de zimlech zuegig witer nach Laos...

Nachtrag zu Chiang Mai: Dr Sunday - Evening - Market womer speter no gseh hei isch schoener, groesser, idruecklecher aus jede Maerit womer bis itz hei gseh (v.a goe o viu Iheimischi dert ga koemlere)

Vo Hong Kong nach Chiang Mai

2009-12-06T02:01:00.000-08:00

Ufem Flughafe z'Hong Kong isch z'naechste Lustige passiert. D'Regula het z'Interaesse vore grosse Gruppe Chinese uf sech zoge. Nachdaem si zersch aui Stueu rund um ues i Beschlag gno hei, hei si agfange ues z'foetele. Gli hei mir gmerkt, dases um d'Regula geit. Si si naebe se ghocket u hei Erinnerigsfotos la mache. Es isch u lustig gsi obwou mir ues nid verstange hei.

E Tag speter het ues d'Bangkoker Rush Hour fasch derzue bracht dr Nachtzug nach Chiang Mai z'verpasse (anstatt 20 Minute hei mir e ganzi Stung gha). Im Zug het sech usegsteut das die buechete 2-Klass-Couchets normali, unbequemi, aengi Sitze si. Nid verwunderlech si mir wyt u breit die einzige Nid-Asiate gsi wo so die ueber 11-stuendigi Fahrt uf sech gno hei.

Z'Chiang Mai isches u schoen: es isch sehr gmuetlech, d'Luet si fruendlech, z'aesse isch guet, es het e wuerklech RISIGE Nachtmaerit u suesch no vieu Spannends.

Vo verschidnige Luet hei mir ghoert das d'Chochkuers in Chiang Mai super sige. Sit gester si o mir grossi Fans. Im ne taegige Kurs hei mir vo Papayasalat ueber Suppene, Nudu- u Risgricht bis zu beruehmte Curry's aus glehrt. Zaeme mit Franzose, Hollaender, Japaner, Australier, Aenglaender u Kanadier hei mir vieu glachet u ab Regulas Fuershow gstuunet.

D'Regula isch hingerem Fuerbau versteckt :-)

Nachemne Fulaenzertag reise mir morn witer gaege Norde nach Pai.

Uesi Highlights: Regulas Fotoshooting mit de Chinese, Chochkurs, gmuetlechi Stimmig in Chiang Mai, bi 30 Grad u Sunne hei si im Supermarkt Chlousechaeppli an.

O am Alfred gfaut die asiatisch-wiehnaechtlichi Stimmig sehr... :-)

Crew am suennele (Lars, Louise, Alfred und Regula)

Alfred hat Gesellschaft bekommen...

2009-12-02T03:11:00.000-08:00

Nach anfaenglichen Aengsten, dass Alfred zu Hause vergessen worden ist, sind wir nun sogar zu fuenft. In Bern sind noch Luise und Lars dazugestossen (Fotos folgen spaeter).
Natuerlich gab es schon die ersten kleinen Pannen. Nachdem wir doch noch zu unseren Exitplaetzen kamen und Regula nicht verhungert ist (ihr Lactosefreies Essen wurde leider in Zuerich vergessen), ist die ganze Reisegruppe gut in Hongkong gelandet und wartet auf den naechsten Flug.

2009-12-01T06:59:00.000-08:00

Mir si parat...

mit insegsammt 33Kg Gepäck starte mr üsi Reis u flüge em Summer entgäge...hi hi

ciao ciao bella svizzera

2009-11-27T09:04:00.000-08:00

Das ist Alfred, unser Reisebegleiter.

Er sorgt für Spannung, Spiel und Spass :-)

2009-11-23T01:30:00.000-08:00

2009-08-02T04:22:00.000-07:00

....am 1. Dezember 2009 geht's los - wir starten unsere Weltreise!