Oktober-Bummel im Tessin

Afangs Oktober isches widermau a dr Zyt gsi es Usflügli zmache. Mir hei super schöns u summerlech warms Wätter gnosse während däm die Daheime nume einisch Räge hei gha a däm Wuchenändi. Angers aus di letschte Mau simer dasmau z'erschte Mau mit klein Néa mit im Gepäck ungerwägs gsi.

Miteme Usflug nach Ponte Tresa ufe Märit, fein ga ässe z'Lugano, flaniere z'Morcote, usgibig brunche im Rustico womer ghwohnt hei, etc. ...heimers üs la guet ga. Wüu mr nid immer dr richtig wäg verwütscht hei mitem Chinderwäge hei de dr Stefan u dr Dänu ono grad ihres Sportprogramm gha wüu si dr Wage X-100 Stägetritte hei müesse trage ;-) Wi immer hets viu zlache gä bi üs u o dNéa het natürlech scho ihre Teil derzue bitreit :-)

Mir fröie üs scho itz uf znächschte Mau!

Short trip to London 2012

Neuseeland - 2nd time ;-)

Am 10.Februar hei mir üsi Sache wider packt u si ab nach Neuseeland fürne Monet. Es isch e länge Flug gsi (30Std.), aber uf sini Art u Wiis ugerhautsam. Mir hei ja beidi gwüsst, dass chlini Ching sehr usduurend chöi si mit gränne, aber DAS Ching ufem Flüger vo Züri bis Dubai hets gschafft vo 6 Stung Flugzyt mindestens 4 Stung aune Lüt im Flüger z'zeige wi guet usbiudet sini Stimmbänder si. "Alle wollten schlafen nur das Baby nicht..." Schad isch er Muetter ersch am Schluss i Sinn cho dr Fernseh azla...vo denn a isch z'Ching stiu gsi.

Am Afang isches no ganz komisch gsi zwüsse dasmer itz so lang Ferie hei, aber me gwöhnt sech extrem schnäu a das unbeschriblech guete Gfüeu :-)

Üses Outo isch es chlises Abetür. Es tönt wines Modäu vo ano dazumau, tschädderet & Klimaalag blast überau use, nume us dene Löcher nid wo derfür dänkt wäre u d'Batterie wo dr Chüeuschrank söt versorge git churz nach absteue vom Outo dr Geischt uf. D'Boxe vom Radio funktioniere nume ir Links-Kurve tadulos, ir Rächts-Kurve geit nume di Linggi Site :-)

Am erste Abe in Hanmer Springs isches würklech chaut gsi. D'Luft i üsem Chüeuschrank isch wermer gsi aus die verusse..."Alle haben kalt, nur der Kühlschrank nicht".

Nach zwöi schöne Täg übere Lewis Pass, womer oscho z'erste Mau si ga wandere, si mir am Lake Rotoroa ga pfuuse. E sehr schöne Ort mit leider EiM zimlech störende Faktor: Es het 1000igi vo Sandflys gha. Di Ficher kenne nüt & hingerlö abartig bissendi Stiche überau (o dert wome sechs nid cha vorsteue). Mir hei d'Lag zum Glück gnue schnäu erkennt u üs trotz sunnig schönem Wätter ipackt bis nume no z'Gsicht het usegluegt. "The only way to beat the sandflys is to keep moving"...auso ja nid stiu stah. Drum hei mir a däm Abe dr 30 minütig Walk bim See grad 5mau gmacht bis mr si ga pfuuse us ändlech gnue fischter isch gsi, dass di lästige Tierli verschwunde si.

Next Stop Nelson: One of the most important things here: "FRESH FRUIT ICE CREAM mit frozen Yoghurt" ;-) & natürlech no ganz viu meh. Mir hei di Wuche ir Region Nelson & Abel Tasman Nationalpark bi und mit John & Niki (di heimer z'letste Mau uf Neuseeland lere kenne) extrem gnosse. Kajake bim Abel Tasmen NP, wandere, bade, Fresh Fruit Ice cream gniesse, sünnele, lafere, usw. het zu üsne Lieblingsbeschäftigunge ghört.

Am Cape Farewell hets üs bsungers gfaue. Wunderschöni, z.T. unberüehrti Natur mit unändleche Witine & troumhafte Stränd. E Ort zum Energie tanke, stuune & gniesse. Mir hei z'Glück gha am Wahariki Beach Baby Seehüng chönne z'beobachte - hennä härzig mit ihrne riise Chugeliouge um no wuschelige Fäu.
Via Weschtküschte simer uf Wanaka. Es härzigs Städtli ame schöne See. Nach 2 Tag Duurräge isches hie wider summerlech-sunnig warm gsi. Drum simer o grad 4 Tag blibe u hei üs Zyt mit witere Wanderige, bade, sünnele, läse, u dasmer üsem Ruef o grächt wärde natürlech o mit Glace schläcke vertribe :-)
Dr Abstächer nach Queenstown heimer ehrlech gseit nume us eim Grund gmacht...hihi...PATAGONIA ICE CREAM - di füre üse Gschmack wäutbesti Glace (10Pkt. bi üsem Glacerating). Wi i üsne Erinnerige isch si geng no unschlagbar guet u risig gsi *mjammie*

O ir Region Mt Cook u Lake Tekapo heimer Zyt vorauem mit wandere verbracht u hei di schöne Ussichte u Bärgwäut gnosse. Das isch üser Meinig nah dr einzig Ort wome würklech cha säge es gseht us wi ir Schwiz...

Nid nume d'Natur, sondern o Tierwäut in Neuseeland isch eifach geniau faszinierend. Schaf hets natürlech a aune Egge u Ändi, aber me cha o wunderbar Vögu, Delphine, Seelöie, Seehüng, Pinguine, u weme Glück het Wale ir freie Natur beobachte. Ungloublech - da vergisst me sich & d'Wäut grad fürne Momänt!

Di letste drei Täg heimer in Sydney verbracht. E Stadt wo üs scho bim erste gmeinsame Bsuech im 2010 superguet gfaue het. Mir hei di letste warme Sunnestrahle igsoge, hei Glace gschläcket, si umegschländeret u hei zfrideni Momänte mit Bekannte gnosse. Hie muess me sech übrigens nie Sorge mache we d'Schue blöderwis ungerwägs lö la ga, me chase usem outomat usela...

Es si vier ungloublech schöni Wuche gsi mit unzählige tolle, lustige, spannende, idrückleche u unvergässleche Ougeblicke, Erläbnis u Begägnige - es het extrem gfägt u isch sicher nid üse letst lenger Usflug gsi! ;-)