AMAZING 2014

Ds 2014 isch es ungloublech tolls Jahr für üs gsi!

Mir hei üsi zwöiti Wäutreis vo A bis Z gnosse. D’Erinnerige a di 7 Monet si mitere extreme Zfrideheit u so viu schöne, spannende, idrückleche u überwäutigende Erläbnis verbunde.

O we üs z’Fernweh scho chli plaaget isches schön wider Daheime dsi. Dr Autag chunt itz o bi üs wider jede Tag es Stückli necher - i üs inne wärde mr aber äue geng chli uf reise si u tröime vo witere Entdeckige uf däm spannende Planet. 

„Ds Einzige wo meh wärt isch auses koschtet het, si üsi Reiseerinnerige. Di horte mr wine glückleche Gizhaus.“

Aues Guete für ds 2015 u jede Tag e Grund härzhaft chönne z’lache!

Regula & Dänu

Dubai

Ufem Wäg Richitg Schwiz hei mir e Stop in Dubai gmacht. Isch no schwirig di Stadt z'beschribe. Si isch gross, lut, verzettlet, aut, nöi, luxuriös, unerhört, gstört, faszinierend, heiss, ufene Art kreativ,  längwilig u glichzytig spannend, charakterlos u säubschbewusst. Me cha säge in Dubai gits vo auem z'gröschte, z'höchschte, z'lengschte, z'erschte, z'türschte, z'schnäuschte, z'meischte, z'nöischte vor Wäut u das wird aus mit grossem Stouz präsentiert.
Üs het di Stadt chli d'Sprach verschlage. Einersits hei üs di Usmass vo au dene Sache (Gebäude & ihri Irichtige, Belüchtige, Aquarie, Ichoufszentre mit über 1000 Gschäft, Kultur, etc.) zum stuune bracht u angersits isches eifach nume wahnsinnig was die hie mache.
Überau si si am boue. Im 2020 findet d'Expo in Dubai statt u bis denn hei si no diversi Projekt. Ungerangerem wei si  o dr Eiffelturm nacheboue, aber natürlech viu höcher aus z'Original.

D'Autstadt zeigt no chli öpis vor würkleche arabische Kultur. E Hafe vou aute Schiff wo si massehaft Wahre am uf-& ablade si, e Gwürz-, Chleider/Stoff- & Gold Souk (Märit) wo eim d'Händler aui gärn öpis möchte verchoufe.

E Trip id Wüeschti heimer no gmacht. Miteme 4x4 dür d'Sanddüne fahre, Kameu ritte u es feins Znacht ime Beduinecamp mit ere Buchtanzuffüehrig het üse Usflug usgfüut. Es isch e guete Usflug gsi, aber für üse Gschmack grad e chli sehr turistisch.
Uf jedefau hei mir di paar Tag in Dubai gnosse u no z'letschte Mau Sunne tanket bevors wider Richtig Europa geit. Üsi Reis geit langsam aber sicher em Ändi zue u mir packe zum letschte Mau üsi Ruckseck. Next & last stop Hamburg...

Sydney - Melbourne

Sydney, üsi absoluti Lieblingsstadt. Mir chöme geng gärn wider da häre zrugg, irgendwie füehle mir üs hie eifach wou. Di 6 Tag i "üsere" Stadt heimer eifach gnosse u si no paar Sache ga entdecke wo mir ide letschte Sydney-Bsüech no nid gseh hei. 
O Pawitra u dr Kai heimer natürlech wider troffe. I ha Pawitra vor 8 Jahr im Flüger vo Bangkok nach Sydney lere kenne u sit denn träffe mir enang au paar Jahr wider. Mir hei mit dene beidne e super Zyt gha. Pawitra het üs o dasmau wider mit authentischem Thai-Ässe verwöhnt - ungloublech fein!

Melbourne, e europäisch aghuchti Stadt mit Kafis a jedem Egge. In Melbourne isch geng öpis los, speziell ufem Federation Square louft auerhand. Z.B. isch grad "Happy Denali Festival" gsi, es indisches Fescht. Traditionelli Tänz & Musig, Indisches Ässe, Henna Tattoos, Schmuck & angeri typisch indischi Sache. Mir zmitts drin i hunderte vo Inder u Inderinne am mitfiire.
Melbourne isch o bekannt für di ville Musicals vo ide verschidene Theater gspiut wärde. So si mir im Princess Theater ds Musical "Once" ga luege - geniau guet isch das gsi, es het üs mega gfaue!

Mitem Bsuech vo dene beidne Städt si di knapp zwöi Wuche Oustralie im Nu düre u mir gö itz mit auerhand nöie Erläbnis witer Richtig Arabischi Emirate.

Strassebeschriftige u WC-Roue-Hauter-Befeschtigunge

Mir si üs vo üsne Reise würklech gwanet Straßecharte zläse u si im Normaufau aus angere aus Orientierigslos. Uf Hawaii isch aus chli angers gsi. Was mir eis hei müesse chere wüu mr irgend e Abzweigig verpasst hei. Zu üsere Verteidigung müesse/ weimer a dere Steu o feschthaute, dass di Strassebeschriftige uf aune drüne Insle zimlech verbesserigswürdig si u es wär ono gäbig wesi die Schiuder wo vorhande si ab u zue vom Grüenzüg würde befreie, so dass me merkt das a dere Steu es Schiud wär u ono chönt läse was druffe steit. Ds Komplizierte isch bi teune Strasse ono das si e änglische und e hawaiianische Name hei. Es stöh aber nid uf aune Charte wome aus Turischt überchunt beidi Näme, das muess me scho säuber usefinge oder merke.

De steit z.B. ir Beschribig für zur Sehenswürdigkeit "turn right in to Kailua Road...", isch no schwirig we d'Strass gar nid agschribe isch u ds Strässli so schmau dasme nid uf di Idee chunt dert abdszweige. U dr Wäg für zu Pearl Harbour isch nume vo Waikiki us beschribe u uf dr Outobahn beschiuderet, weme vo Weschte chunt steit niene öpis vo Pearl Harbour. O wes mit dr Zyt scho chli müehsam isch gsi so öpis zfinge, hets o geng wider viu z'Lache gä wäg dene kuriose oder nid vorhandene Wäbeschriftige.

Öpis muess me de Hawaiianer aber la, si si bis itz di erschte wos gschafft hei dr WC-Roue-Hauter so z'platziere dasme ohni komischi Verränkige zmache cha Papier abrisse weme ufem stiue Örtli hocket. 

In Kuba heisi di kuriosi Agwohnheit d'WC-Roue obem Spüeuchaschte ds platziere, auso hingerem Rügge wemes us dr Sicht vom WC-Bsuecher aluegt - sehr unpraktisch het üsi Erfahrig zeigt. 

In Südamerika schints d'Norm dsi dr Roue-Hauter zwüsche d'WC-Schüssle u d'Wang ine zquetsche. Das Biud gseht de öpe so us, das z'WC-Papier ungefähr uf Füdlihöchi isch u so nach dases eim zum Teu sogar achunt. O die Variante vor WC-Roue-Hauter-Befeschtigung het üs weniger überzügt.

Uf dr Oschter Insle isch dr Hauter so wyt wäg agmacht gsi dasme o mit länge Arme ke Chance het gha zu Papier zcho ohni ufzstah. Es isch auso i dere Situation wichtig gsi vorem WC-Bsuech dra zdänke chli Papier abzschrisse... In Kanada u Amerika mache sis ähnlech wi in Südamerika, nume dass si scho dr Fortschritt gmacht hei dr WC-Roue-Hauter chli höcher z'befeschtige. Wesis itz no schaffe das ganze 40-50cm witer vore (auso ca. uf Chnöihöchi) z'befeschtige sisi ufeme guete Wäg. 

Nach 5 Monet reise DAS WC-Roue-Hauter-Befeschtigungs-Highlight uf Hawaii - ändlech isch das Ding am "richtige" Ort befeschtiget: ungefähr 10-20cm vor u ob de Chnöi links oder rächts ar Wang, so dass me gäbig cha füre länge u chli Papier abrisse.

Hawaii - Oahu

Di letschte drü Tag uf Hawaii heimer uf Oahu verbracht u mit üsem Mietouto no chli d'Insle erkundet. Ar North Shore simer de Surfer ga zueluege wisi uf dene über 7 Meter höche Wäue rite u hei gseh wi Schiudchröt am Strand pfuuse - a Land chunt ersch zur Gäutig wi risig die si. Ar Waianae Cost hets ganz viu schöni Stränd u Delphine wo id Bucht chöme cho ruhie u ar Südostküschte heimer über di 1100 Stägetritte dr Koko Head bezwunge. Bi über 30 Grad isch das fei e chli e Chrampf gsi, aber es het sech glohnt - d'Ussicht isch super gsi vo dert obe. 

Ir Nechi vo Honolulu simer no in Pearl Harbour gsi u hei dert d'Gedänkschtätte vom Agriff uf Pearl Harbour bsuecht - sehr idrücklech.

Während üsne letschte Täg isch dr Hurrikan Ana im Azug gsi Richtig Hawaii u ide Nachrichte hets gheisse, dass si dermit rächne daser am Friti, denn we üse Flug geit für nach Sydney, uf d'Insle trifft. Am Friti hei de Wind u Wäue wi akündet dütlech zue gno u es het geng wider chli grägnet - zum Glück het d'Madame Ana nidso pressiert u isch ersch am Samschti uf Hawaii acho. Üse Flüger het Honolulu pünktlech verla.

Hawaii - Kauai, The Garden Island

E troumhaft schöni Insle. Chlin, grüen u abwächsligsriich. Üs hets hie extrem guet gfaue u wemer das vorhar gwüsst hätte wäre mr no lenger blibe. Di 8 Tag uf Kauai heimer mit lere Surfe, Bodyboarde, am Strand lige u läse, wandere u natürlech mitem entdecke vor Insle verbracht. 

Ar North Shore hets ei Strand am nächschte, aber jede isch i sire Art chli angers. Vo ruchem Strand mit gwautige Wäue bis zur ruhige Bucht fingt me hie aus. Meischtens sisi umrahmt vore saftige grüene Landschaft oder miteme Soum vo höch ufragende Paume.

Dr Waimea Canyon u d'Napali Cost zeue zude Highlights vo Kauai. Dr Waimea Canyon isch sozäge di chlineri Usfüehrig vom Grand Canyon, eifach viu grüener. Hie chame super ga wandere u vo diverse Ussichtspünkt dr Canyon bestuune. O wener chliner isch aus si berüehmt Kolleg ufem Feschtland, ischer imposant u i üsne Ouge sogar no fasch chli schöner. 

Im Süde heimer e Abstächer a Glass Beach gmacht. Dert glitzerets nume so we d'Sunne dri schiint. Vor X Jahre isch dert mau e Glas Deponie gsi u ds Meer het sech nah dis nah a dene Glasfläsche zschaffe gmacht use zu chline Glaschügeli verarbeitet. Weme chli gneuer luegt erkennt me di bruune, grüene u wisse Glassteindli ganz guet. Mittlerwile e sehr schöne Ort.

Kauai isch üs i dere churze Zyt richtig ads Härz gwachse. Mir dänke, mir chöme widermau!

Hawaii - Big Island

Big Island isch di gröschti u jüngschti Insle vo Hawaii. Ar Weschtküschte isches trochen, karg u heiss. Dert hets unzähligi schöni Sandstränd u me cha super ga schnorchle. Hie heimer ds erschte Mau Stand-up-Paddling usprobiert. Das isch vou dr Trend hie u es ghseht rächt eifach us. Isch aber schwiriger aus mr z'Gfüeu hei gha. Es het hennä gfägt u mir hei paar Schlück Merrwasser gha vor luter lache. Am Afang heimers völlig nid im Griff hei gha uf däm Brätt zstah u derzue no z'paddle. Chum isch wider e Wäue cho (was ja ufem Meer no öpe dr Fau isch) simer dr nächscht Toucher ga näh. Isch no beruhigend gsi z'gseh dases angerne glich isch gange wi üs.

Ar Weschtküschte hets o 1000igi vo Spinner Delphine wosech im Wasser vergnüege. Di heisse so wüu si bim usem Wasser gumpe bis zu 7 Umdräige chöi mache. Mir hei e Schnorchutrip gmacht u z'Glück gha zmitts drin chönne ds schwümme. Es ungloublechs Erläbnis 100erti vo wiud läbende Delphine um eim zha. Zum Teu sisi nume 30-40cm näbe eim düre gschwumme u weme ganz ruhig im Wasser gläge isch sisi gwundrig cho luege was mir äch für Gstaute si. Ungerwasser het me se zäme ghöre kommuniziere u we ihri Stimme si lüter worde het me gwüsst itz chunt de wider e nöie Schwarm verbi zschwümme. Es Erläbnis womer äue nidso schnäu wärde vergässe! Ufem gliche Usflug heimer ono 3 riise Manta Roche gseh.  Wi grossi schwarzi Plache sisi dür ds Wasser gleitet - faszinierend u chli beängschrigend glichzytig.

Ar Südküschte isch dr Volcano Nationalpark. Es Gebiet miteme aktive Vulkan. Aktuell fliesst d'Lava sehr langsam u ungerirdisch drum heimer das Spektaku leider nid chönne gseh. Es isch aber scho sehr idrücklech gsi i dr Nacht dr Vulkan gseh glüeie u rouchne. Di ungerirdisch fliessendi Lava isch übrigens o dr Grund werum Big Island stetig grösser wird. Ar Küschte fliesst Lava ids Meer u türmt sech uf zu nöiem Land. Ide letschte 30 Jahr si 2 Quadratkilometer Land derzue cho ufgrund vo däm Phenomen. 

Ufere Wanderig dürne aute Krater het me idrücklech chönne gseh wisech d'Natur langsam wider zrugg kämpft. I dere Lavabedeckte Region vor Insle wirds langsam wider grüener. Dr schwarz Ungergrund bringt di verschidene Grüen vo Böim u Strücher so richtig zum lüchte - wunderschön! 

Im Oschte u Norde vor Insle isches sehr grüen u füecht. Es het Wasserfäue, Rägewaud u schwarzi Sandstränd. Hie wachse o au di feine tropische Frücht. Di früsche, gscmacksintensive Smoothies hei bi üs zur Tagesverpflegig ghört.

Big Island isch sehr abwächsligsriich u het wahnsinnig viu z'biete. Mir hei vo auem chli öpis entdeckt, hei aber no lang nid aus gseh...

Szenewächsu - Hawaii

Schwüeli heissi Luft isch üs entgäge cho bim verla vom Flughafe in Honolulu u i üsne zuenige Schue hets gli afa brodle vor luter Wermi. Vode Polinese am Flughafe isch e zfridnigs "Aloha" cho mitem derzue ghörende Grinse.

Bim warte ufe Böss für zum Hotel, hei mir sofort feschtgschteut das ab itz wider "Island-Time" agseit isch u aus gmüetlech oder gar nid vorwärts geit. Bis di Fahrer hei usknoblet gha wär i welem Böss cha/muess mitfahre si teu Turischte, wo mit üs gwartet hei, schier a Rand vor verzwiflig cho. Mir hei währemd de letschte 5 Mönet scho ei, villech o drü Gäng zrugg gschautet u hei gwüsst das i sore Situation nume Geduld ha hiuft u schlussändlech de scho aues so chunt wis muess...

Di erschte 3 Tag heimer uf Oahu in Waikiki verbracht. Das isch sozsäge ds nöie Honolulu. Es het e Strandpromenade mit unzählige Läde aller Art, Kafis, Restaurants u  dr Waikiki Beach. Hie gseht me vorauem Turischte oder villech chönt me fasch säge me gseht vorauem Asiate u vor luter Asiate heimer üs mängisch dra müesse erinnere dasmer uf Hawaii si. Dr ganz Ort isch o ufe Turismus usgrichtet - auso nüt speziells u nid würklech ds richtige Hawaii.

Mir heis eifach gnosse am Strand z'lige, z'bade, z'pfuuse, z'läse, d'Lüt z'beobachte u di schöne Sunneungergäng z'bestuune.

Vom Norde i Süde

Dawson City (Yukon, CAN) - Watson Lake (Yukon, CAN) - Hyder (Alaska) - Prince George (BC, CAN) - 100 Mile House (BC) - Barrière (BC) - Merritt (BC) - Summerland (BC) - Osoyoos (BC) - Lake Chelan (WA, USA) - Portland (Oregon, USA) - Seattle (WA, USA) - Vancouver (BC, CAN) - Vancouver Island (BC, CAN)

Di letschte 6 Wuche si sehr churzwilig gsi u zum Teil i beschter Gseuschaft.
Uf Watson Lake heimer üs scho lang gfröit. Dert hets e "Sign Post Forest" mit über 88'000 Schiuder us dr ganze Wäut. Strasseschiuder, Outonummero u säuber gmachti Schiuder. Neu derzue isch e Wägwiser vode Fiumnächt cho wo mir äxtra mitgno hei. I au dene Schiuder chame fei e chli verwile u uf Entdeckigstour ga. Ungloublech was für riise Schiuder Lüt vo Daheime mitgno hei.

Hie hei mir o Sabine u Andy, vo Bade, wo mir ufem Dempster Hwy troffe hei wider gseh. Zäme simer ufem Cassier Hwy Richtig Hyder (Alaska) gfahre zum ga Bäre bim Lachsfische beobachte. Üsi unändlechi Geduld isch de mit 3 Schwarzbäre u eim Junge belohnt worde. Isch toll gsi chönne zluege wisi uf Fischfang si us nume 5-10 Meter. U das ir freie Natur.
Leider isch ds Wätter i dere Region nid bsunders warm u schön gsi, drum hets üs südwärts zoge.

Via Prince George u 100 Mile House simer uf Barrière cho. Ungerwägs heimer no d'Franziska u dr Miron troffe (d'Franziska isch e "auti" Schueukollegin vo mir). Nacheme zfridene Abe am See mit Lagerfüür heimer di zwöi grad mit ads Rodeo uf Barrière gno. Dert heimer ds sächste höch zuegluegt wisech di Ritter bi Räge u Hagu mit ihrne Bulle im Matsch träit hei (das si öpe no Manne ;-)
Dr Dänu u mi hets nach däm witere verrägnete Tag definitiv itz Okanagen Valley zude summerleche Temperature zoge u so heimer üs nacheme letschte gmüetleche u schöne Abe am Hormon Lake o vo Sabine u Andy müesse verabschide.

Bi herrläche 30 Grad u Sunneschiin simer dür ds Okanagen Valley kurvet a Seeä entlang, dür Räbbärge u Obschtplantasche bis über Gränze id USA.
Ir Region um Brewster isch di gröschti Öpfuabouregion vo ganz Washington. Dass het dert Öpfuböim so weit das Auge reicht u si si bhanget vou gsi, so richtig gluschtig zum abläse u dri biisse....extrem feini Öpfu wimer feschtgschteut hei.
Witer unger am Lake Chelan heimer 5 Tag "Nichtstun" gnosse (ussert natürlech bade, läse u Glace schläcke).
D'Fahrt vo dert bis uf Portland het bis uf viu Wind nid viu zbiete gha. Portland isch hingäge e z'frideni Stadt zum düre schländere u immer wider d'Nase ine Lade ds strecke. D'Stadt isch bekannt für di ville verschidene Food Carts ade Strasseränd u für Voodoo Doughnuts wo's nume dert git. Ä Typ in Prince George (CAN) fahrt zwüschine äxtra wäg dene Doughnuts uf Portland u het gmeint di müess me unbedingt probiert ha. Gesagt getan: obwou mirs meh mit de Glace hei, heimer müesse säge di si auso würklech fein gsi.
Next Stop Seattle. E kuuli Stadt, mit ungloublech guetem Kafi, eme tolle Märit, feiner Glace, eme idrückleche Visitor Center vor Melinda & Bill Gates Foundation (www.gatesfoundation.org), ere schöne Ussicht vor Space Needle ure Outletmall.
Üs hei di 3 Tag Seattle gafue. Es het gfägt widermau unger chli meh Lüt dsi nachem vereinsamte Alaska u Yukon.

Ja, u so het sich dr Kreis in Vancouver und uf Vancouver Island Nach 9 Wuche wider gschlosse. Es isch chli wines Hei cho gsi bi Chrige & Colin in Port Alberni. Bi ihne heimer üsi letschte 10 Tag in Kanada Verbracht. Mir hei au di tolle Erläbnis u Idrück nomau la revue passiere u Zyt gnosse mit dene beidne u ihrem Hung Scotia.

Alaska, Yukon, Northwestern Territories hei üs extrem guet gfaue u sehr beidruckt. Wahnsinnig schön u unvergässlech was mir i dene 2 1/2 Monet aus hei dörfe erläbe! - 
mir dänke, mir chöme widermau...