Salar de Uyuni (Bolivien) - Höhepunkt 4925 M.ü.M., Tiefpunkt -22Grad

Dr 4-Tagestripp id Sauzwüeschti vo Bolivie isch es einzigs Highlight gsi. Absolut dr Hammer was mr dert aus gseh hei.

Ds 6te höch ime 4WD Tschip simer ungerwägs gsi. Düre Tag isches mit Thermoungerwösch, Chappe u warmer Jagge agnähm gsi bi strahlendem Sunneschiin u staublauem Himmu. Ir Nacht isches bi -22 Grad o mit Thermoungerwösch, Chappe u warmer Jagge, Schlafsack u Dechi nid würklech gmüetlech gsi. Es isch nähmlech dinne öpe glich chaut gsi wi dusse u dr Bettungerbou isch e Betonchlotz gsi, was d'Situation nid wermer gmacht het. Mir si nid erfrohre wi erwartet u wüsse itz dasmer definitiv 

wintertouglech si ;-)  was nid heisst dasmer so öpis abartig chauts nomau widerhole...

Trotz Cheuti isches einmalig gsi u mir wärde wahrschinlech no lang vo däm Tripp verzeue u dra zrugg dänke.

Mitem Bös in Chile ungerwägs...

Vo Tacna (Peru) simer miteme Sammutaxi über Gränze nach Chile gfahre bis uf Arica. Vo dert us heimer dr Nachtbös gno uf San Pedro de Atacama. 

Di Fahrt isch vo A-Z amüsant u ungerhautsam gsi. Vo 60 Persone si mir di einzige Turischte gsi....di Chilene si mit riise Täsche, Köffer u Plastikseck vou Züg i dä Bös gstige. Mir hei üs scho gfragt was äch da los isch. Chum simer losgfahre heisi afa umetischele u Chleider inenang stopfe. Üs isch de gli mau klar worde, dass di aui uf Peru si ga ichoufe wüus dert viu biuiger isch aus in Chile. Es het usgseh aus hei die aui es Lädeli wosi di Sache när wei verchoufe. Si hei unzählihi T-shirts, Jaggene u.v.m. kömerlet. Werum si hei afa umbigele u Züg i Jagge-& Hoseseck stopfe heimer bis dert häre no nid ganz begriffe.

Wo aber de zmitts ir Nacht dr Bös uf zmau  im Nirgendwo ghaute het u aui wi vome Wäspi gstoche hei afa 2-3 T-shirts, Pullöver u Jaggene überenang alege, us het gheisse mir müesse aui ustige inklusive Gepäck hets üs afa tage. Mir si bire Kontrollsteu gsi u hei üses Gepäck dürne Scaner müesse la (am Morge am 4i). Di hei aui chli meh ikouft aus si hätte dörfe wisech usegsteut het. Verwütsche het sech aber niemer...isch o kes Wunder bi dene lasche Kontrouene wo die hie hei.

Für das ganze Spektaku guet chönne z'beobachte heimer z'hingerscht im Bös sozsäge Logeplätz gha. Es isch hennä amüsant gsi dene zuezluege. Schlussändlech heisi üs ono vo ihrem koufte Züg wöue aträie. Mir hei de dankend abglehnt...

Am Morge um di haube 7ni simer in Calama acho womer hei müesse umstige. Dr Bös nach San Pedro isch aber ersch am 8ti gfahre u es isch soumässig chaut gsi verusse. Mir si di einzige gsi wo hei wöue umstige u dr Böschauffeur het de gmeint mir söue eifach i däm Bös warte bis dr anger chunt dasmer nidso müesse frühre. Gesagt getan. Isch nume chli es mulmigs Gfüeu gsi wo dä Bös itz Depot gfahre isch, z'Liecht glöscht isch worde u Türe bschlosse. "he hallo! was söu das...?"....töif düreschnuufe, druf vertroue das si scho wüsse dasmer gärn i 1.5 Stung ufe anger Bös möchte u Geduld ha im Warte....das lert me hie in Südamerika. 

Nach 12 Stung ungerhautsamer Bösfahrt simer zimlech K.O. am Ziu acho.

Spiischarteübersetzig & peruanischi Ghüderabfuehr

Ide meischte Restaurant heisi ir Spiischarte natürlech aus uf spanisch u mängisch ono uf änglisch. Di Übersetzige chöme z.T.  ganz luschtig use u me weiss de eigentlech immer no nidso genau was me äch de när ufem Täuer het....wi zum Bischpiu "Alpaka attacks into the pan"....da mir zspanische nid verstange hei u bir änglische Übersetzig doch chli stutzig si worde wasme äch de da serviert überchunt heimer üs de für öpis angers entschide ;-)

Wüus in Peru viu ströinendi Hüng het darfme dr Ghüder o am Tag vor Ghüderabfuehr nid eifach use steue. Das Peruaner aber nid verpasse we dr Ghüderwage chunt, heisi entweder eine wo wi wiud mitem Triangu Lärm macht oder dr Ghüderwage isch mitere mega lut dödelnde Melodie  usgstattet wo dür d'Strasse tönt. Es isch i jedere Stadt chli angers u d'Melodie wird wüchentlech gwächslet.

Vorauem bim erschte Mau isch das es luschtigs Spektaku zum beobachte. Weme dür d'Strasse louft u uf zmau überau Türe uf gö u d'Lüt mit ihrne Ghüderseck chöme cho z'springe.

Peru

Üsi Reis dür Peru

Lima - Cusco - Ollantaytambo - Aquas Calientes - Machu Piccu - Cusco - Arequipa - Chivay - Colca Canyon - Cabanaconde - Arequipa - Tacna

I dene knapp 3 Wuche womer in Peru verbracht hei, hei mir viu tolls erläbt u ganz gueti Lüt lere kennä. 

Mir hei rächt Respäkt gha vo däm extreme Wächsu vo Meereshöchi uf 3400 M.ü.M. in Cusco. Abgseh vo chli Chopfweh u Churzatmigkeit isch das aber ganz guet gange.

Cusco het üs extrem guet gfaue. Idrücklech wi di Stadt i das Tau boue isch. Mitere Iwohnerzau vo ca. 340'000 isches eigentlech e grossi Stadt. Im Zäntrum mitem Plaza des Armas u au dene chline Strässli & Gässli ringsum, usgstattet mit unzählige Lädeli, Cafés u Restaurants, merkte me das gar nidso. Es het hennä viu zentdecke u uszprobiere gä. 

Im Backpacker womer schlussändlech überne Wuche mit de meh oder weniger gliche Lüt ghuset hei, hets mega gfägt. Bim Zmörgele ar Sunne im Garte mit au de angere hets jewils viu zverzeue u usztsche gä. O d'Bsitzer vom Backpacker hei sech derzue gseut wemer üsi zfridene Gsprächsrundine gha hei. Schlussändlech hets üs aui fasch chli hert gha dä zfridnig Ort u di guete Lüt zverla u wider getrennti Wäge zga.

MitemTemperaturungerschid zu Kuba heimer am Afang  zkämpfe gha. Düre Tag isches zwar geng um di 20 - 25 Grad gsi u würklech brönnend uf dere Höchi, aber soubau d'Sunne unger isch hets starch abküeut uf 0-4 Grad. Di Hüser hie in Peru si nid würklech isoliert u so isches dinne nid unbedingt wermer gsi aus dusse. Ir erschte Nacht heimer mit Bettfläsche, Chappe u Haustuech pfuuset u si gottefroh gsi wo am nächschte Morge d'Sunne am 7ni scho wider i Garte brönnt het.

Vo Cusco us hei mr e Tripp gmacht uf Machu Piccu. Es ächts Highlight uf üsere bishärige Südamerikareis. Di Ruine si würklech zum bestuune. Gwautig was di Inkas dert boue hei.

Augemein isches wahnsinnig idrücklech widi Lüt ufem Land läbe u schaffe uf ihrne Fäuder u wisi ihri Sache eigentlech geng ufem Rügge trage mit ihrne gwobene Tüecher. O d'Ching si geng mit derbi. Entweder o miteme Tuech uf X verschideni Arte umbunge oder ufem Arm.

Arequipa - la Ciudad Blanca - het üs am afang nidso gfaue. Nachdäm mr aber o hie jede Tag chli meh entdeckt hei u interessanti Lüt hei lere kennä, hets üs afa pässle.

Vo hie us simer e 2-Tages Trek im Colca Canyon ga mache. 2500 Höhemeter heimer gmacht i dene zwe Tag u hei üs geng so zwüsche 2100 M.ü.M. u 3400 M.ü.M bewegt. Bim Ufstig vo dene 2100 M.ü.M. uf 3400 M.ü.M het me de scho gmerkt das d'Luft chli dünner wird u me chli meh muess schnuufe. Üsi Bei si fei e chli brucht worde, mir hei ufem Wäg zum Canyon u im Canyon säuber wunderbari Landschafte, Lamas, Alpakas u Kondore gseh. Das isch e super Usflug gsi!

E Schreckmomänt heimer gha womer eines Abends in Arequipa im Bett gläge si u uf zmau d'Schibe, d'Lampe u z'Bett hei afa schüttle - es Ärdbebbe vo 5.1 uf dr Richterskala wimer am nächschte Tag erfahre hei. Wüus um Arequipa no paar aktivi Vulkän het, isch das anschinend normau... Es het trotzdäm chli es mulmigs Gfüu bi üs hingerla u mir si froh gsi isch das nume einisch vorcho.

Mit Bös u Collectivo Taxi simer de via Tacna Richtig Chilenischi Gränze gfahre...

Elektrodusche: guet oder doch eher läbesgfährlech

I diverse Casas heisi Elektrodusche. Das heisst es chunt e Stange us dr Muur, dranne verloufe Kabu wo i Duschchopf gö. Am Duschchopf chame 3 verschideni Temperaturstuefe ischteue: Heiss, Warm, Chaut.

Uf dr Site vom Duschchopf hets jewils es 2-3cm längs Röhrli miteme Stöpseli drin. 

Es isch üs vo Afang a nidso ghüür gsi unger dene Dusche mit de Stromkabu so nach bim Wasser, aber es hei anschinend scho X Turischte & Iheimischi so duschet u o überläbt.

Eines Morgens woni ha wöue dusche, isch z'Wasser uf zmau us däm chline Röhrli cho anstatt us dr Duschbruse. Mit de Füess bereits im Wasser stehend hani dr Finger wöue vor ads Röhrli häbe zum luege ob de z'Wasser wider am rächte Ort usechunt...chum bini däm Wasserstrau acho hets mr ghörig eis putzt. I bi no nie so schnäu wider usere Dusche use cho wi denn...

Kubaner & wie sie das Essen servieren...

I dene "Casa Particulars" ( Privatungerkünft) wo mir aube übernachtet hei chame o ässe. Zmorge & Znacht.

Scho ide erschte Täg heimer bim Zmorge d'Erfahrig gmacht dases sehr richhautig usfaut: Pro Person e Umelette, Chäs, e Früchtetäuer mit Mango, Ananas, Papaya, Guava & Banane, Brot, Anke & Honig u z.T. ono Fleisch. Derzue e Chrueg vou früsche Fruchtsaft & Kafi. Das het auso sattghaute bis am Abe.

Ir zwöite Wuche heimer di grossi Überraschig erläbt was Znacht betrifft...si hei üs ir "Casa" nume gfragt ob mir gärn Fleisch oder Fisch möchte.

Es het de när nid wi erwartet eifach e Täuer mit Fisch, Ris u es paar Gurkeschibli gä wi bishär....nei, es het fougendes gä:

- e Kydneybohnesuppe mit Ris

- es Salattäuer

- es riise Fischfilet mit Härdöpfu ( uf eim Täuer dr Fisch u ufeme angere d'Härdöpfu)

- zum Dessert e Banane & es Stück Turte

Pro Person heimer sagehafti 7 Täuer ufem Tisch gha. Es isch nähmlech nid eis nachem angere cho wi mir das vo Daheime kenne, sondern aus mitenang.

Mir hei nume no gstuunet wo die geng meh uftischet hei & hei gar nid rächt gwüsst wo afa u ob äch das würklech aus für üs dänkt isch oder ob nid doch no angeri derzue stosse. Es isch aus für üs gsi...

Nach däm erschte setige Erläbnis heimer dänkt di Lüt sige itzbeifach bsunders grosszügig gsi & das das nid dr Norm entspricht. Weit gefehlt....es isch i däm Stiu witer gange.

Z'Ässe isch geng extrem fein gsi & di Lüt hei sich geng mega Müei gä, aber mir si üs vorcho wi Gäns wo gstopft wärde. Wemer nid usgässe hei, hei di Señioras geng gmeint mir heiges nid fein gfunge. Si hei nid chönne verstah dasmer nid aus i üs chöi inestopfe.

Sogar wemer gseit hei mir möchte nume e Houptgang u kes Desserrt hets e riise Sach gä. Anstatt es Stück Turte heisi de eifach e Täuer vou Frücht bracht pro Person - das isch ja schliesslech kes Dessert ;-)

Kuba

Weme uf Kuba reist macht me i gwüsse Beriche sozsäge e Zytreis id 50er Jahr. D'Outo, d'Strasse, d'Fortbewegisgmittu (z.B. Ross & Kutsche), ...

Angersits sisi sehr wyt was d'Biudig betrifft & si im Gägesatz z.B. zude meischte Amis o chli über zganze Wäutgscheh informiert. 

Es isch sehr idrücklech u irgendwie verruckt wi di Mönsche hie z.T. läbe. Das chame gar nid beschribe, di läbe ihre angere Wäut aus mir.

Mir hei e gueti Zyt gha uf Kuba. Es het viu schöns, idrücklechs, interessants & surreals uf dere Insle. Aber Kuba wird wou äue nie zu üsne Troumdestinatione ghöre. Irgendwie hei mirs i dene 4 Wuche nid gschafft totau idi Wäut izdouche - werum o immer...

Natürlech heimer o z'einte oder angere Gschichtli erläbt womer nidso schnäu wärde vergässe & einigi Situatione womer nume no hei glachet oder nüm angers hei chönne aus grossi Ouge mache...