Dempster Highway - WE DID THE DEMPSTER - 1474 KM Schotterpiste

737 KM ufe bis uf Inuvik u di gliche 737KM wider zrugg. Tönt längwilig, isches aber nid,  abgseh vo ca. 200 KM. U das isch nüt ufts ganze gseh.

Weme sech geit ga informiere übere Dempster, isch eini vode erschte Frage, ob me es Resärverad het u wenn ja wi mängs. Es isch aus Gravel Road u je nach Wätter isch d'Strass ime guete bis misserable Zuestand. Es isch es chlises Abetür gsi dert ufe zfahre u es het gfägt.

Landschaftlech no einsch angers aus das womer bis itze gseh hei. Wüu d'Strass gredi ufe bis fasch zur Beaufort Sea geit, dürquert me verschideni Vegetatione. Subarktischi Taiga-& Tundra, Uslöif vode Rocky Mountains, Quadradkilometer wyti Wäuder, Regione mit Sulphurgschtei (orange-rot), 100erti vo Seeä, me überquert diversi Päss u brucht 2x e Fähre für übere Fluss. Derzue überquert me dr Arctic Circle u fahrt vom Yukon id Northwestern Territories. UND mir hei dr Afang vom Indian Summer dörfe erläbe :-)

D'Sunne hets guet mit üs gmeint, mir hei schöns u trochnigs Wätter gha, bis uf eis Zwüschestück womer ine Sturm si cho. Vo eim ufe anger Momänt het me no bis knapp vor Motorhube gseh u z'Outo hets so ghuddlet dasmer hei müesse haute. Isch auso no gfürchig weme z'Gfüeu het es blast eim sammt em Outo furt. Nach 100 KM heimer das überstange gha u üses Ziu gli erreicht.

Inuvik isch es verschlafnigs Örtli, am Ändi vor Wäut, mit 3500 Iwohner wo houptsächlech us verschidene Indianerstämm/Eskimos (First Nations) beschteit.

Dr Plan wärs gsi vo hie us uf Tuktoyaktuk (wyter chame nüm) ds flüge u dr Zeie ids Arktische Meer ga zha ;-). Wägem Huduwätter in Inuvik isch das nid müglech gsi u ewig ime Ort warte, wome nüt cha mache, bis d'Sunne wider füre chunt heimer o grad nid möge.

D'Rückfahrt isch uf de erschte 250KM matschig, rütschig, trüeb u nass gsi, när wider wunderschön.

Öpis vom schönschte, gwautigschte u idrücklechschte womer je gseh hei! Es macht eim irgendwie glücklech u zfride so öpis chönne z'erläbe.

Karl - Heinz

Üse Truck-Camper, Karl-Heinz, isch bis itze e tröie Begleiter. Zwar fei e es Gfährt, aber är fahrt sech tiptop. Mir si happy mit üsere fahrbare 1-Zimmerwohnig.

Zimlech am Afang vo üsere Tour het dr Herr Egger unbedingt wöue wüsse wi wyt das mir äch chöi fahre miteme voue Tank. Isch ja schön & guet weme das weiss, aber mitem Wüsse das nume sehr säute e Tankschteut chunt villech nid di beschti Idee (ha i gfunge). Dr Verbruch bi däm Monschter vo Outo isch risig, me chunt auso nid sehr wyt.

Mir si de gfahre u gfahre ubdä Zeiger vom Benzinstand isch schneuer retour aus erwartet. Bi chli meh aus 1/4 Tankfüuig wär e Tankschteu cho. Dr Dänu het gmeint, dass längi no locker bis i nächscht Ort (ca 200 KM). I hät lieber tanket...

Wi das so üblech isch, ischdr letscht 4tu Benzin geng chli ender düre aus di angere 3/4 vom Tank u di Tankschteu womer langsam aber sicher brucht hätte isch eifach nid cho...

Mir hei scho afa uschnoble wär mitem lääre Kanischter muess loufe u wär bim Outo wartet. Genau, mir hätte e Kanischter gha, nume leider läär.

Wos de uf zmau lut het afa bimmbele u im Display gstange isch "FUEL LEVEL LOW" isch de o dr Dänu chli närvös worde, ob äch das würklech no so wyt längt wis söt. D'Strass isch Kilometerwyt gradus gange u es het nid usgseh aus chäm da gli es Örtli. Ufe aueriletscht Drücker heimers de no grad bis zur Tankschteu am Ortsigang gschafft u si froh gsi het kes müesse loufe.

Bim Dänu het sich de es zfridnigs Lächle abzeichnet u är het gmeint "gsehsch, i ha ja gseit es längt..."

Chli speter heter de (zu mire Zfrideheit ;-) doch no müesse zuegä daser dänkt heig i chöm derzue ds säge "gsehsch, i ha ja gseit es längt nid..."

Skagway (AK) - Dawson City (Yukon, CAN)

Skagway (AK) - Carcross (Yukon, CAN) - Whitehorse (Yukon, CAN) - Kluane Nationalpark (Yukon, CAN) - Tok (AK) - Valdez (AK) - Palmer (AK) - Anchorage (AK) - Seward (Kenai Fjords Nationalpark, AK) - Soldotna (Kenai Fjords NP (AK) - Lake Clark NP (AK) - Kenai (AK) - Denali NP (AK) - Fairbanks (AK) - North Pole (AK) - Delta Junction (AK) - Dawson City (Yukon, CAN)

Es isch schwirig u fasch unmüglech z'beschribe wi ungloublech beidruckend das aus isch wo mir hie dörfe erläbe. Viufach chöimer eifach nume stuune: 

Di viufäutigi Tierwäut, di atemberoubendi Natur mit ihrne Wytine, gwautige Gletscher, unzählige Seeä, Moorlandschafte, au di verschidene Grüen, di Einsamkeit. Mängisch isches wi ime Troum womer z'Gfüeu hei jede Ougeblick z'erwache u z'merke das aus gar nid Würklechkeit isch.

In Valdez heimer z'erschte Mau Lachse gseh springe. Zwüsche Juli bis Septämber schwümme die Flussufwärts zum ga leiche. Mir hei üs vorgsteut dasme da so es paari gseht springe, was mir aber gseh hei si 1000igi wo am gliche Ort düre wei. Das isch eis Gedränge im Wasser u me gseht eigentlech nume Fische u nüm viu derzwüsche. Di Lachse chöi mitere Chraft gumpe womer vome Fisch so nid erwartet hei.

In Seward, im Kenai Fjords Nationalpark simer e Tag miteme Schiff ufts Meer use. Seeotter wo sech ds zähte höch im Wasser hei la tribe, Papageietoucher wo tolpatschig si umegschwadderet, e Grauwau wo diräkt näbem Schiff düre isch u üs sini prächtigi Flosse zeigt het, e 12-chöpfigi Killerwau-Familie, diversi Bugguwahle u eine dervo het e richtigi Show abgliferet mit gumpe, Flosse zeige, träie, sprütze u winke, Delphine wo sech e Wettrenne gliferet heinmitem Schiff, Seelöie bim fische u e kaubernde Gletscher von ca. 500 Meter Entfernig. Es isch e sagehafte Tag gsi. Mir hei au di Sache gseh wome sech aus chlises Ching geng wünscht :-)

Wyter isch d'Fahrt mit üsem Truck-Camper nach Soldotna (immer no im Kenai Fjords NP). Vo hie us simer miteme chline Flugi i Lake Clark NP gfloge. Für 2 Tag simer dert usse im Nirgendwo gsi ime chline Hüsli wo es Ehepaar u e junge Typ drin wohne. Mitem Matt simer ga Bäre luege. Dr Lake Clark NP isch bekannt für sini grossi Bärepopulation. Dür di extremi Ebbe u Fluet strande di ineschwümmende Lachse im seichte Gwässer, was z'Fische für Bäre attraktiver macht. Bi Ebbe grabe si im Sang o nach Muschle. Beides e wichtige Nahrigsquelle für sech Winterspäck azfrässe.

Mir hei sooo viu Bäre gseh wimers üs nie hätte la ertröime. Zum Teu us 5-20 Meter Entfernig. Mir heine bim Fische chönne zueluege, e Muetter mit drü Junge isch im Meer ga bade u aschliessend hei si sech im Gras umetummlet u gschpiut. Faszinierend vo A-Z! Di Bäre si näbe üs dürespaziert aus wäre mr gar nid da. Mängisch heisi churz d'Nase id Luft gstreckt u gschmöckt u mängisch nume churz gluegt was mir äch si. So flauschig u putzig wisi o usgseh, wesi nach si, sisi riisig u mir si froh gsi heimer dr Matt derbibgha wo sit 10 Jahr um di Bäre ume läbt.

2 Tag hei mir im Denali Nationalpark verbracht. Mir hei extrems Wätterglück gha mit strahlendem Sunneschiin u blauem Himmu. Im Denali NP darfme wäg de Tier nid mitem eigete Outo düre fahre. Es het aus glich ussehendi Bösse wo Tier scho vertrout mitne si. D'Bösfahrt isch läng gsi (8 Std. hin & zrugg), aber es het sech glohnt. Mir hei dank däm Prachtstag dr Mt. Denali i sire voue Pracht gseh (das isch dr höchscht Bärg vo Noramerika). Me seit dä mach sis eigete Wätter u nume 30% vode Parkbsuecher gseh ne bis zum Spitz :-) D'Landschaft im Denali isch sehr idrucksvou u abwächsligsriich.

Bäre, Elche, Daal Schaf, Karibus, Adler, Koyote u unzähligi Ärdmändli hei dr Tag no zuesätzlech spannend gmacht.

In Fairbanks simer bim für üs nördlechschte Punkt vo Alaska acho. D'Stadt an sich isch nüt speziells u het o nid bsunders viu zbiete. Da mir dr Summer ir Schwiz mit Aare schwümme u bötle sozsäge verpasst hei, hei mir das hie ufem Chena River gmacht bi 26 Grad u Sunneschiin ime Kayak.

North Pole isch es Städtli churz nach Fairbanks. Hie isch 365 Tag im Jahr Wiehnachtsstimmig uf Amerikanisch (kitschig u glitzrig). Es het di gröschti Samichlousestatue (das isch sones typisches Fotoobjekt für d'Japaner ;-) u es Santa Clause Haus o im Ouguscht cha Wiehnachtsdeko -& Gebäck kömerle u Wiehnachtslieder lose. Irgendwie aus no ganz witzig gmacht.

Via Alaska Hwy u Top of the World Hwy simer uf Dawson City cho. Usgangspunkt füre Dempster Hwy wo üs bis ad Beauford Sea uds Städtli Tuktoyatuk wird bringe im louf vor nächschte Wuche. Dawson City isch es Goudgräber-Städtli mit Charme. Es het ganz viu chlini Lädeli u aus isch im Stiu vor Jahrhunderwändi boue. Hie überchunt me o dr mit Saage umworbne Whisky mitem Mönschezeie drin...